Renkontiĝoj - Naciaj

Renkontiĝo en Meksikurbo, 24an de septembro 11ah.*

Submitted by Mallely on Mar, 09/19/2023 - 08:24

Jes, ja estas tempo por denove revidi nin kaj viziti pliajn vidindaĵojn de Meksikurbo. Ĉifoje, en venonta dimanĉo, la 24an de septembro je la 11ah, ni vizitos la Telegrafan Muzeon, ni renkontiĝos en la enirejo de la muzeo, kiu troviĝas en: Tacuba #8, Col. Centro, Meksikurbo, la plej proksima metrostacio estas Allende. La enirejo estas senpaga.

Propono estas ke post tiu vizito, ĉiuj, kiuj volas, povas iri promeni sed tiu estas laŭ la tempo kaj deziro de ĉiu partoprenanto.

Ĉu duboj, demandoj? Sendu mesaĝon al 55 6674 1733

Venu, praktiku Esperanton kaj disvastigu la lingvon!

* Respondecas: Guadalupe Vega.

 

Paralela Universo en Cuernavaca, Morelos, 18an-20an de aŭgusto!*

Submitted by Mallely on Mer, 08/02/2023 - 14:34

Saluton, amikoj de Esperantujo! Ni ĝojas inviti vin al plej mojosa ĉi-jara evento, la Paralela Universo okazos en la urbo de Cuernavaca de la 18-a ĝis la 20-a de aŭgusto 2023.

Por tiu evento ni luprenis belan apartamenton en la historia centro de Cuernavaca. Vendrede, la 18-an de aŭgusto de la 16a horo ni havos aliron al nia renkontiĝejo kaj tiun tagon ni vizitos la Historian Centron por esplori ties kulturajn lokojn kaj ĝui ties gastronomion.

Sabato estos plena je amuzo kaj kreado, ĉar ni profitos la ĉeeston de Esperantistoj, kiuj volas partopreni en la usona filmo-konkurso "5a Usona Bona Film-Festivalo", kreante kelkajn 5-minutajn filmojn. Ankaŭ en tiu tago ni ĝuos libertempon en la naĝejo kaj ludos tabloludojn. En tiu speciala tago, ni rememoros la 136-jaran datrevenon de Esperanto kaj festos la eventon Paralela Universo 2023. Dimanĉe, antaŭ adiaŭi, ni vizitos unu el la diversaj muzeoj, kiujn Cuernavaca ofertas, por riĉigi nian kulturan sperton.

Loĝado

Ni promenu en la Centro de Tlalpan, sabate la 1an de julio!*

Submitted by Mallely on Ven, 06/16/2023 - 08:11

Saluton al ĉiuj amikoj de la kulturo kaj aventuro! Ni invitas vin partopreni nian venontan renkontiĝon en la bela kaj inspira Casa de la Cultura "Frissac". Ĉi foje por komenci nian aventuron ni ĝuos la belecon de la domo kaj ekspoziciojn kiuj estos en ĉi tiu trezora loko, kiu lokiĝas en Tlalpan.

Ni renkontiĝos sabate, la 1an de julio 2023 je la 12a horo en la enirejo de la Casa de la Cultura "Frissac", kies adreso estas: Moneda s/n, Tlalpan Centro, Tlalpan, Meksikurbo. Ĉi tiu renkontiĝo estos oportuno por esplori kaj aprezi la belecon kaj kulturon de la loko kaj praktiki Esperanton, indas mencii, ke la eniro estas senpaga. Post la vizito, ni ankaŭ povos eksplori la proksimajn placojn de la centro de Tlalpan kaj viziti la merkaton.

Ni instigas vin esti pretigitaj por la varmo kaj konsilas havi kun vi protektilon kontraŭ la suno, akvon, ĉapelon kaj komfortajn ŝuojn por sperti agrablan tagon.

Ni antaŭdankas vin pro via partopreno kaj kunhavigu ĉi tiun inviton al viaj amikoj kaj familianoj!

Ĝis baldaŭ!

Renkontiĝo en la Muzeo de Antikvaj Ludiloj, 14an de majo, 11ah.*

Submitted by Mallely on Mer, 05/03/2023 - 07:32

Ĉu vi memoras viajn ludilojn kiam vi estis infano? Ĉu vi imagas kiel estis la ludiloj de viaj gepatroj aŭ geavoj? Ĉu vi iam ludis per ili? Ĉi foje ni invitas vin al tre interesa renkontiĝo en la Muzeo de Antikvaj Ludiloj.

La Muzeo de Antikvaj Ludiloj estas unika kaj historiplena loko, kun impresa kolekto de antikvaj ludiloj, kiu nin translokigos al nia infanaĝo. De lignaj ludiloj ĝis porcelanaj pupoj, vi trovos ĉion en ĉi tiu nekredebla muzeo.

La kosto de la enirbileto estas $75.00 (meksikaj pesoj), sed jen bonega novaĵo!: ni havas biletojn por aktivaj membroj de MEF, kiuj konfirmos sian partoprenon. Bonvolu skribi mesaĝon al telefona numero 5537842401 por konfirmi vian partoprenon kaj ke ni fortenu vian senpagan bileton.

Ĉu vi neniam estis membro de la asocio? Profitu! la kotizo por tute novaj membroj kostas $50.00 (meksikaj pesoj) eĉ viaj akompanantoj povas aliĝi, tiel vi helpos la asocion kaj samtempe vi ŝparos. Pliajn informojn pri membrecoj al MEF vi trovos ĉe: https://www.esperanto-mexico.org/eo/membreco

Antaŭhispana Parko “Tezozómoc” kun eksterlandanoj: 7an de aprilo!*

Submitted by Mallely on Ven, 03/31/2023 - 14:38

Saluton al ĉiuj! Jen bonega novaĵo: okazos nova renkontiĝo dum la  Sankta Vendredo! La plano estas viziti "Parque Tezozómoc", kaj ni havas la plezuron informi vin ke kanadano Michal Sirucek kaj germanino Emmi Breuninger akompanos nin. Ili estas avidaj esploristoj kaj amantoj de la natura mondo.

La parko "Parque Tezozómoc" estas bone konata en la regiono pro sia natura beleco kaj varia eco-sistemo. Ĝi estas hejmo de multaj specioj kaj ofertas multajn eblecojn por aktivecoj en la natura medio. En la parko oni povas fari birdobservadon, eksplori la lageton, kaj koni la aksolotlojn.

La enirejo al parko estas senpaga, ĝi troviĝas sur Manuel Salazar, Prados del Rosario, Azcapotzalco, en Meksikurbo; proksime de la metrostacio El Rosario. La rendevuo estas vendrede, la 7an de aprilo, je la 11a horo ĉe la ĉefa enirejo apud la parkejo, ĉe la loko eblas aĉeti kaj konsumi manĝaĵon kaj trinkaĵojn tamen se vi volas, simple kunportu la proprajn.

Ni esperas ke vi povos aliĝi por paroli-praktiki Esperanton, kunhavigi bonan tempon kune, interŝanĝi spertojn kaj koni novajn amikojn. Ĉu duboj, demandoj, bv. skribi mesaĝon al 55 3784 2401

Ekskluziva malfermo de muzeo por ni en sabato, la 25an de marto!*

Submitted by Mallely on Ven, 03/10/2023 - 14:53

Karaj homoj! Ni havas bonegan novaĵon: la Muzeo pri la Servo de Elektraj Veturiloj (Museo del Servicio de Transportes Eléctricos) malfermiĝos nur por ni: Esperantistoj, interesitoj pri Esperanto kaj amikoj! Ĉi tiu muzeo, kiu troviĝas en strato Municipio Libre 402, San Andrés Tetepilco, Iztapalapa, Meksikurbo, ĝenerale estas fermita sabate, sed ni atingis sabatan gvidotan viziton. Do, se vi aŭ viaj amikoj laboras de lundo al vendredo matene, ĉi tiu estos eble via ununura ŝanco por viziti la muzeon, do profitu!

La rendevuo do estas sabate, la 25an de marto, je la 10a50h en la enirejo de la muzeo, bv. veni akurate por kune eniri. Oni povas atingi la muzeon per la linio 3 de la Trolebuso, kiu venas el Mixcoac.

Ni restos en la loko ĝis la 13ah, ni estos gvidataj tra la muzeo kaj iam dum la vizito ni havos duonan horon por manĝi lunĉon, do, bv. kunporti sandviĉon aŭ ion por manĝeti kaj trinki. Vi rajtas inviti kiun ajn: amikojn, familianojn, kolegojn aŭ koramikojn, eĉ se li aŭ ŝi ne estas esperantisto.

Ni ekvojaĝu al Muzeo de la Fervojistoj, 11an de februaro, CDMX*

Submitted by Mallely on ĵaŭ, 02/02/2023 - 09:34

Jam estas februaro, tamen neniam malfruas por bondeziri, do feliĉan 2023!  Ni komencu la renkontiĝojn de la jaro per vojaĝiga invito; jen la plano:

Ni renkontu nin sabate, la 11an de februaro je la 13a:30h en la Metrobus-stacio Auditorio, direkto Indios Verdes. Ĉu vi jam vojaĝis per la du-etaĝa Metrobuso? Ni tion faros! La vojo estos tra la bela avenuo Reforma, kaj nia fina celloko estos la “Museo de los Ferrocarrileros” (Muzeo de la Fervojistoj), en “La Villa”. La kosto de la Metrobuso estas nur $6.00 (meksikaj pesoj).

Ni vizitos tiun muzeon! La muzeo estas malgranda, sed bela kaj interesa. Ĝia adreso estas:

Alberto Herrera s/n kaj Aquiles Serdán

Col. Aragón La Villa

Gustavo A. Madero

La vizito al muzeo estas senpaga, atentu, ke ni planas eniri la muzeon je la 14a:30h.

Zamenhofa Tago 2022 en Meksikurbo, 16an de decembro*

Submitted by Mallely on ĵaŭ, 12/08/2022 - 01:52

Meksika Esperanto Federacio kaj aktivuloj de la ĉefurbo de la lando invitas ĉiujn esperanto-parolantojn, lernantojn, komencantojn kaj homojn, kiuj interesiĝas pri la lingvo al la tradicia “Zamenhofa Tago”. Ĝi okazos vendrede la 16an de decembro je la 16ah. en la “Esperanta Domo”, kiu troviĝas en San Pedro de los Pinos, ĉefurbo de Meksiko. Ni babilos, manĝos, renkontiĝos kun amikoj kaj ludos. Ni planas resti iom longe, do se vi devas labori aŭ havas ion alian kaj vi iom malfruas, ne zorgu iru tien por bone fini la tagon! 

Ĉiu homo bv. kunporti siajn proprajn manĝaĵon kaj trinkaĵon. Kiel kutime, MEF havos bongustan kukon por festi kune. Estos krome bona eblo por aĉeti en libroservo kaj, kompreneble, por aliĝi al MEF kaj UEA pagante la jaran kotizon. Bv. konfirmi ĉeeston plej malfrue en la 14a de decembro.

Dankon pro via subteno kaj Feliĉan Zamenhofan Tagon!

Vizito al Museo del Estanquillo, sabate la 5an de novembro*

Submitted by Mallely on Ven, 10/21/2022 - 06:21

Saluton meksikurbanoj kaj esperantistoj de aliaj lokoj! Certe vi jam sopiras praktiki Esperanton kaj kunvivi denove, ĉifoje ni iru al la centro de la urbo por viziti alian muzeon, temas pri la “Museo del Estanquillo”, kiu enhavas grandan kolekton de Carlos Monsiváis pri artaĵoj kaj kulturaĵoj pri la urbo kaj Meksiko. Ĉi tiu muzeo troviĝas en Isabel la Católica 26, Centro, Cuauhtémoc, ĉefurbo de Meksiko. La rendevuo estos sabate, la 5an de novembro je la 11:00 atm, ni atendos 10 minutojn en la enirejo, se vi venas poste, serĉu nin ene. La vizito al muzeo estas senpaga!

Post la vizito de la muzeo certe ni estos malsataj… do ni manĝos vegetaranan bufedon! La restoracio troviĝas tre proksime, en Motolinia 31, ĉiu pagos siajn manĝaĵon kaj trinkaĵon, ni kalkulas ke kosto estos inter 150mxn kaj 200mxn por ĉiu dependante kiujn trinkaĵojn vi elektos aŭ se entute vi mendas trinkaĵojn.

Ĉu vi volas veni? Ne forgesu ke komencantoj ĉiam estas tre bonvenaj.

Ni atendos vin!

* Organizas: MEF. Respondecas: Víctor Sombra. Bildo: Gabriel Zúñiga.

 

Paralela Universo 2022 en Meksik-urbo, sabate la 20an de aŭgusto*

Submitted by Mallely on Ven, 08/12/2022 - 11:20

Homoj de Meksik-urbo (CDMX) kaj ĉirkaŭaĵo pretas partopreni en postpandemia Paralela Universo, renkontiĝi, lerni, amuziĝi, kunvivi kaj videbligi la internacian lingvon “ESPERANTO”.

Akompanu nin en sabato, la 20an de aŭgusto je la 10a h. La rendevuo estos sub la tegmento kiu troviĝas antaŭ la Botanika Ĝardeno de la parko “Parque Bicentenario”, la adreso estas:

Av. 5 de Mayo #290

San Lorenzo Tlaltenango

Miguel Hidalgo

11210, Meksik-urbo.

La tegmento troviĝas tuj post kiam oni eniras la parkon, apud la ponto de la rivereto.

Renkontiĝo en CDMX okaze de la Esperanto-Tago, 29an de julio 17ah.*

Submitted by Mallely on Dim, 07/24/2022 - 17:18

Jam someras kaj ĉisemajne estos la Esperanto-Tago, do ni festu ĝin kune! Ni renkontiĝu persone kaj babilu kun novaj kaj malnovaj amikoj.

Kiam? vendrede, la 29an de julio, je la 17a horo.

Kie? En la Esperanta domo, kiu troviĝas proksime de la metrostacio San Pedro de Los Pinos.

Kial? Por festi kune la Esperanto-tagon, profiti la ŝancon praktiki la lingvon kaj pasigi agrablan tempon kune.

Kiuj? Ĉiuj rajtas partopreni, komencantoj, niaj karaj gelernantoj, spertuloj pri la lingvo, ktp. Indas mencii ke la renkontiĝon partoprenos prezidantino de MEF, Mallely Martínez, kaj eĉ eksterlandanoj: Doniben Jiménez, prezidanto de la Kolombia Esperanto Ligo kaj kanadano Andy Blair.

Ni ankaŭ celas tiam plani venontan aranĝon por partopreni aktive en Paralela Universo 2022 (iru al https://paralelauniverso.com se vi ne konas pri kio tio temas), do, pensu pri via plej ŝatata ideo!

Kion kunporti? Bonan humoron kaj, se vi tion ŝatas, tablo-ludojn.

Renkontiĝo en Mérida, Yucatán. 10an de julio je la 15ah.

Submitted by Mallely on ĵaŭ, 07/07/2022 - 16:10

Ni invitas ĉiujn komencantojn, parolantojn de Esperanto kaj homojn, kiuj interesiĝas pri interkultura komunikado al renkontiĝo, kiu okazos sude de la lando, en Mérida, Yucatán.

La rendevuo estas en dimanĉo, la 10an de julio je la 15a horo en la restoracio de la hotelo “María del Carmen”, kiu troviĝas en:

Strato 63 #550 x 68 kaj 70

Centro

Mérida, Yucatán

Kompreneble la renkontiĝo ne havas ajnan koston, tamen ĉiu pagos sian konsumon.

Profitu la eblon praktiki la lingvon, koni eksterlandajn esperantoparolantojn, ekscii pri novaĵoj, kiuj okazas en Esperantujo nacie kaj internacie.

Ĉu vi havas demandojn, dubojn? Bv. skribi al estraro@esperanto-mexico.org aŭ sendi mesaĝon al 55147 53963

BONVENON!

 

5an de junio je la 11ah en CDMX. Venu kaj konu la kulturojn de la mondo!*

Submitted by Mallely on Lun, 05/30/2022 - 07:20

Saluton meksikurbanoj kaj mondaj civitanoj! Estas tempo por renkontiĝi denove. Ĉi foje ni iru al la centro de la urbo por viziti tre belan muzeon, temas pri la Nacia Muzeo pri la Kulturoj de la Mondo. Do, ni ĝoju vidi parton de la diverseco de la mondo en ununura tago kaj ununura loko! La muzeo troviĝas en Moneda 13, Centro, Cuauhtémoc, ĉefurbo de Meksiko. La rendevuo estas dimanĉe, la 5an de junio je la 11:00 atm (ni atendos 10 minutojn en la enirejo). La vizito al muzeo estas senpaga!

Akompanos nin Tadeo Morales, kinostudento kiu volas fari dokumentan filmeton pri Esperanto! Ĉu vi volas esti intervjuita aŭ aperi en ĝi kaj helpi en la disvastigado de nia kara lingvo? Do venu amase, via ĉeesto kaj partopreno ĉifoje estos eĉ pli grava ol kutime kaj ne forgesu ke komencantoj ĉiam estas tre bonvenaj!

Post la vizito de la muzeo certe ni estos malsataj… do ni manĝos vegetaranan bufedon! La restoracio troviĝas tre proksime, en Motolinia 31. La bufedo kostos proksimume $125.00 (meksikaj pesoj).

Ĉu vi volas veni? Ĉu vi havas dubojn? Skribu al 5537842401.

Ni atendas vin!

Printempan tagon en Xochimilco, dimanĉe la 10an de aprilo*

Submitted by Mallely on Dim, 04/03/2022 - 14:53

Ĉu vi ŝatus partopreni en via unua ĉeesta Esperanta renkontiĝo? Aŭ eble ne estos la unua sed ĉu vi jam sopiras renkontiĝi denove kun geamikoj? Certe printempe estas bona! Ni vizitu grandan renovigitan parkon kies nomo estas “Parque Ecológico Xochimilco”.

Tie ni povos viziti muzeon, rigardi la lagojn, florojn kaj birdojn, babili, ripozi, ludi. Estus tre bona ideo lupreni ian boateton, “trajinera”n, aŭ biciklojn, do se vi volas fari tion bonvolu ne forgesi kunhavi iom da mono. Ankaŭ kunportu akvon kaj vian pretigitan manĝaĵon aŭ monon por manĝi tie! Eblas manĝi piknike aŭ en restoracio.

Ĉu vi pretas? Ni vidiĝos dimanĉe, la 10an de aprilo, matene je la 10a horo en la granda korto kiu troviĝas tuj post la enirejaj turnkrucoj.

La parko troviĝas en: Anillo Perif. 1, Ciénega Grande, Xochimilco, Meksikurbo. Vi povas atingi ĝin per busetoj kiuj iras el metrostacio “Constitución de 1917” al “El Vergel”, kaj de tie oni devas marŝi 20 minutojn, aŭ de la metrobusstacio “Calzada del Hueso” marŝi dum 30 minutoj.

Tributo al latinamerika muziko en Esperanto, 29an de januaro*

Submitted by Mallely on Dim, 01/23/2022 - 15:47

Meksika Esperanto Federacio plezure invitas vin al esperanta recitalo, en kiu Edgar Trujillo faros tributon al latinamerika muziko.

Edgar estas instruisto pri muziko kaj ĥoristo de la simfonia orkestro de Toluca, Estado de México, li eklernis esperanton en 2020 kaj de tiam li kombinas tiujn du universalajn lingvojn: muzikon kaj esperanton.

La evento okazos pere de zoom en la venonta sabato, la 29an de januaro je la 12a ptm (UTC -6).

adreso: https://us02web.zoom.us/j/84720567192?pwd=ZlY0YjBnLzVqTFZVMjhBWmZGY1hSZz09

uzantnomo: 847 2056 7192

pasvorto: MEFrecital

Do venu kaj profitu la eblon sperti belan, kulturan tageron kun ni ĝuante la talenton de nia kara Edgar.

Ĉiuj estos bonvenaj!!!

* Organizas: MEF kaj Edgar Trujillo.

 

Paĝoj

Subscribe to Renkontiĝoj - Naciaj